Plantun de Prouvènço

Pèr coumpara dos planto d'encò nostre

Hypochaeris glabra & Scleranthus annuus

Engraisso-porc(-di-sablo)

Hypochaeris glabra

Asteraceae Compositae

Àutri noum : Engraisso-porc, Pèu-de-grapaud, Mourre-de-móutoun, Poutarié, Erbo-de-l'esparvié.

Noms en français : Porcelle des sables, Porcelle glabre.

Descripcioun :
Aqueste engraisso-porc que trachis dins li sablo, fai uno rouseto de fueio gaire espesso, quasi sènso péu e dentado. Se destrìo de Hypochaeris radicata qu'èi pu menut emai sa racino eisado à leva de terro, e subretout qu'a pas tóuti sis akène emé un long benc qu' aquéli dóu deforo n'an ges, au contro de Hypochaeris radicata (fotò). Coumpara emé l'engraisso-porc.

Usanço :
L'engraisso-porc-di-sablo es acampa coume ensalado champanello. Es uno ensalado douço e pas amaro.

Port : Erbo
Taio : 10 à 90 cm
Fueio : basalo
Tipe bioulougico : Teroufite
Cicle bioulougico : Planto de l'an

Gènre : Hypochaeris
Famiho : Asteraceae
Famiho classico : Compositae
Tribu : Cichorieae
Ordre : Asterales

Coulour de la flour : Jauno
Petalo : >6
Ø (o loungour) flour : Pancaro entresigna
Flourido : Printèms - Estiéu - Autouno

Sòu : Si
Autour basso e auto : 0 à 800 m
Aparado : Noun
Remarco : Ensalado champanello

Liò : Sablo - Tepiero seco - Pelouso
Estànci : Termoumediterran à Subremediterran
Couroulougi : Pancaro entresigna
Ref. sc. : Hypochaeris glabra L., 1753

Gnavello(-de-l'an)

Scleranthus annuus

Caryophyllaceae

Nom en français : Gnavelle annuelle.

Descripcioun :
Aquelo planto, proun ramificado, se tirasso sus la sablo e lis endré trepeja. Sus si tijo se podon vèire uno à dos bando de péu crespu. Li fueio soun redo e en long. Li flour, verdo, soun pas bèn grosso e fan d'enflourejado agroumelado. La subsp. presentado eici, emé de flour gaire duberto e que trachis dins li mitan primàri, ié dison polycarpos. Coumpara emé la gnavello-renadivo.

Usanço :
Fai partido dóu group (38 meno) de flour dicho "de Bach". Ramenten que lou mege, Dr Edward Bach (1886-1936), adoubè de poutingo de flour que dèvon "armounisa l'equilibre epsichique de la persouno". La gnavello permetrié de prendre de decisioun. En Poulougno, au siècle passa s'acampavo li babo de vermèu (Coccus Polonicus) que reston sus li racino pèr n'en faire un coulourant rouge.